Сексуално образование на лицата со нарушувања од аутистичниот спектар: употреба на техниката „Социјални приказни“

Stankova T, Trajkovski V. Sexual Education of Persons with Autistic Spectrum Disorders: Use of the Technique: “Social Stories”. Sex Disabil (2020). https://doi.org/10.1007/s11195-020-09655-y

Резиме на разбирлив јазик

Лицата со нарушувања од аутистичниот спектар (АСН) често имаат потешкотии со социјалните вештини, а тие потешкотии особено се забележуваат кога станува збор за сексуалноста, интимните односи и личните граници. Затоа, важно е сексуалното образование да биде приспособено на нивните индивидуални потреби и можности.

Во ова истражување била применета техниката „Социјални приказни“, развиена според принципите на Керол Греј. Целта била да се утврди дали оваа техника може да помогне во подобрување на знаењата за сексуалноста кај лица со АСН.

Во истражувањето учествувале три лица со АСН. Тие имале индивидуални средби во траење од 45 минути, еднаш неделно, во период од шест месеци. Пред почетокот и по завршувањето на програмата биле проверени нивните знаења, а биле интервјуирани и нивните родители.

Биле опфатени теми како:

• разликување на приватните и репродуктивните делови на телото;
• промените што се случуваат за време на пубертетот;
• разликување на пријатен и непријатен допир;
• сексуални односи;
• контрацепција.

Главен резултат

По шест месеци, учесниците покажале подобрено и проширено знаење за сексуалноста. Сепак, периодот од шест месеци не бил доволен за да се забележат јасни и значајни промени во нивното однесување.

Заклучок: „Социјалните приказни“ може да бидат корисна алатка за сексуално образование на лицата со АСН, особено за стекнување знаења и разбирање на сексуалноста. Но, за да се постигнат видливи и трајни промени во однесувањето, веројатно е потребна подолга и континуирана едукативна програма.