Stojanovska I, Chatterjee A, Ahmed Syed Y, Trajkovski V. The utilization of psychopharmacological treatments for individuals with autism spectrum disorder (ASD) in a middle-income European country. Research in Autism Spectrum Disorders 2024; 111.
Резиме на разбирлив јазик
Лицата со нарушување од аутистичниот спектар (АСН) понекогаш имаат потреба од лекови за намалување на одредени симптоми, како што се раздразливост, агресивност, анксиозност, нарушувања на расположението или епилептични напади. Сепак, малку се знае како овие лекови се користат во земјите со среден приход, како што е Македонија.
Целта на ова истражување беше да се утврди колку често се користат психофармаколошки третмани кај лица со АСН во Македонија и како родителите ја оценуваат нивната ефикасност. Во истражувањето учествуваа 103 родители на лица со АСН, кои одговорија на прашалник за лековите што им биле препишани, нивната употреба и нивното мислење за постигнатите резултати.
Резултатите покажаа дека на 62% од лицата со АСН им биле препишани психофармаколошки лекови, но само 48% навистина ги користеле. Најчесто биле препишувани антипсихотици и антиепилептични лекови, при што рисперидонот и валпроатот биле најчесто користени. Лековите почесто ги користеле адолесценти и возрасни, но нивната употреба била релативно висока и кај помалите деца. Исто така, било утврдено дека лицата со потешки симптоми на аутизам почесто примале ваква терапија.
Повеќето родители сметале дека лековите имаат делумен ефект, односно помагаат во намалување на одредени симптоми, но не ги отстрануваат целосно тешкотиите поврзани со аутизмот.
Овие резултати укажуваат на потребата родителите да добиваат појасни и потемелни информации за целта, очекуваните придобивки и можните несакани ефекти од психофармаколошките третмани. Истражувањето може да им помогне на здравствените работници и носителите на здравствени политики да го подобрат квалитетот на грижата и поддршката за лицата со нарушување од аутистичниот спектар и нивните семејства.
