Нема одлука за прекин на наставата од УКИМ и МОН

Почитувани студенти,

Во овие тешки мигови за македонската нација, во која сите тагуваме и сме во голем стрес и притисок од немилиот настан, навистина сум непријатно изненаден од е-поштата која што ја добив од вашата колешка дека самоиницијативно сте донеле одлука утре да не дојдете на настава. Претпоставувам дека сите сте ја поддржале и дека таа не ми пишала само во нејзино име или во име на 2-3 студенти. Сакам да ве известам дека и покрај тоа што се денови на жалост, тоа не подразбира недоаѓање на настава и губење на часови. Ја разбирам вашата тага, чемер и гнев, но утрешниот ден требаше да се обидам да ве оттргнам од суровото секојдневие и помалку и психолошки да ви влијаам стабилизирачки, но нејсе, вие самите одлучивте поинаку. Да ве потсетам: НЕ постои никаква одлука за прекин на наставата од страна на УКИМ и МОН. 

Во прилог ја пренесувам во целост е-поштата што ја добив од студентката:

„Добра вечер професоре,

Ви пишувам за да ве известам дека утре нема да присуствуваме на вашето предавање, сите се согласија. Се надевам дека ќе не разберете.

Ви благодарам,

Б.“

Намерно го давам иницијалот, а не целото име како што стоеше во потписот на пораката. Првиот колоквиум по предметот ХГ многу брзо се наближува, а вие знаете дека е многу тешко во распоредот да се најде друг термин кој ќе ви одговара, а притоа да се пополнат 7 часови и да се најде и слободна просторија. Чекам предлог за одработување на утрешните загубени часови, во спротивно ќе бидете принудени сами да си го учите материјалот за колоквиумот.

На крајот, еве јавно да изразам најдлабоко и најискрено сочуство до семејствата на настраданите луѓе, а на хоспитализираните да им посакам побрзо опоравување со помалку компликации (иако тоа го сторив вчера преку пост споделен од ФЗФ).

Со почит,

Предметен наставник

п.с. во меѓувреме стигна уште една порака, цитирам:

„Почитуван професоре ,

Со договор на сите студенти за утрешното предавање нема да присуствуваме , затоа што сите сме растревожени, чувствуваме одговорност да ве известиме и вас . Се надевам ќе не разберете. Ви благодарам однапред.

Со почит ,

А.Б.

Бавноста на МОН во донесувањето на одлуки

Почитувани колешки и колеги,

Со голема доза на резигнираност го пишувам овој пост. Имено, уште на почетокот на 2018 година конкурирав во МОН за добивање на финансиски средства за објавен труд во списнаие со фактор на влијание за 2017 година. Нормално е да очекувате за неколку месеци одлука, па ајде нека е и до крај на 2018 година. Но, денес е 1 септември 2019 година и уште немаат никаков абер да не` известат. Се јавив неколку пати таму кај одговорните, па минатата година беше: „Чекајте сега да помине референдумот", почетоков на годинава одговорот беше: „Чекајте сега да поминат Претседателските избори". Мене навистина не ми е јасно зошто една најобична процедура се врзува со избори? Ако немаат пари, нека кажат и нека не објавуваат конкурси и нека не ја залажуваат научната јавност во Македонија. Кога поминаа Претседателските избори изговорт беше: „би требало да биде во јуни", за да пред некој ден разберам дека одлуката би била донесена најрано во октомври. Алоо НАСА (читајте МОН) се работи за трудови објавени во 2017 година. Па ова ви е таква бавност што човек може само да се покае што конкурирал, дал документи и што се надева на нешто. Со ваква бавна администрација нема одење во ЕУ, барем не во следните 10-15 години.

Раскажувачот