Родителски средби на универзитет НЕМА!

Почитувани студенти,

Јас мислам ви е јасно дека на универзитетот не постојат родителски средби. Навистина не можам да разберам зошто и покрај тоа пуштате ваши родители да ме бараат низ факултетот. Вие сте полнолетни граѓани на оваа држава и треба самите да барате консултации кај мене, а не да ги праќате вашите родители. Родителските средби завршија во средното образование. Тоа е понижувачки и за вас и за нив. Особено, во ден за испити НЕ примам никакви консултации. 1. Заради тоа што прегледувам тестови и сакам побрзо да ви дадам резултати и не сакам никој да ме вознемирува. 2. За да оневозможам евентуални ургенции. Консултации во денови кога имам испит нема ниту за вас. Најискрено ве замолувам да ги почитувате овие правила на игра.

Ви благодарам за разбирањето,

Предметен наставник

Нема одлука за прекин на наставата од УКИМ и МОН

Почитувани студенти,

Во овие тешки мигови за македонската нација, во која сите тагуваме и сме во голем стрес и притисок од немилиот настан, навистина сум непријатно изненаден од е-поштата која што ја добив од вашата колешка дека самоиницијативно сте донеле одлука утре да не дојдете на настава. Претпоставувам дека сите сте ја поддржале и дека таа не ми пишала само во нејзино име или во име на 2-3 студенти. Сакам да ве известам дека и покрај тоа што се денови на жалост, тоа не подразбира недоаѓање на настава и губење на часови. Ја разбирам вашата тага, чемер и гнев, но утрешниот ден требаше да се обидам да ве оттргнам од суровото секојдневие и помалку и психолошки да ви влијаам стабилизирачки, но нејсе, вие самите одлучивте поинаку. Да ве потсетам: НЕ постои никаква одлука за прекин на наставата од страна на УКИМ и МОН. 

Во прилог ја пренесувам во целост е-поштата што ја добив од студентката:

„Добра вечер професоре,

Ви пишувам за да ве известам дека утре нема да присуствуваме на вашето предавање, сите се согласија. Се надевам дека ќе не разберете.

Ви благодарам,

Б.“

Намерно го давам иницијалот, а не целото име како што стоеше во потписот на пораката. Првиот колоквиум по предметот ХГ многу брзо се наближува, а вие знаете дека е многу тешко во распоредот да се најде друг термин кој ќе ви одговара, а притоа да се пополнат 7 часови и да се најде и слободна просторија. Чекам предлог за одработување на утрешните загубени часови, во спротивно ќе бидете принудени сами да си го учите материјалот за колоквиумот.

На крајот, еве јавно да изразам најдлабоко и најискрено сочуство до семејствата на настраданите луѓе, а на хоспитализираните да им посакам побрзо опоравување со помалку компликации (иако тоа го сторив вчера преку пост споделен од ФЗФ).

Со почит,

Предметен наставник

п.с. во меѓувреме стигна уште една порака, цитирам:

„Почитуван професоре ,

Со договор на сите студенти за утрешното предавање нема да присуствуваме , затоа што сите сме растревожени, чувствуваме одговорност да ве известиме и вас . Се надевам ќе не разберете. Ви благодарам однапред.

Со почит ,

А.Б.

Излезе од печат учебникот „Академско пишување и објавување“

Почитувани колешки и колеги, драги студенти од сите три циклуси,

Со особена чест сакам да Ве известам дека денес, 27.12.2022 година излезе од печат долго очекуваниот учебник со наслов „Академско пишување и објавување“. Долг период во мене тлееше потребата да напишам вакво дело и да ја заокружам мојата издавачка дејност која ја започнав уште како секретар на редакцијата на списанието „Дефектолошка теорија и пратика во периодот 1998-2000 година. Потоа од 2004 до 2008 година бев заменик уредник, за да од ноември 2008 до септември 2017 година бидам и главен и одоговорен уредник на ДТП/JSER. Во меѓувреме бев и сум главен и одговорен уредни на Journal of ReAttach Therapy and Developmental Diversities (2018-2022), а од август годинава на Journal of Health and Rehabilitation Sciences. Со годините наназад се собираше искуство и материјали, за да во април 2021 година конечно решам да седнам и да почнам да го пишувам овој учебник. Тогаш и предложив на проф. д-р Наташа Ангелоска-Галевска од Инситутот за педагогија да биде коавтор. Бидејќи таа држи методолошки предмети, веднаш се согласи и одисејата започна. Поради некои здравствени проблеми речиси во текот на целата 2021 година не бев во можност да работам онака како што јас знам и умеам. Но, затоа, во оваа 2022 година запнав со полна пареа, подоцна се придружи и колешката и така во август го завршивме нашиот дел од работата. Потоа, следуваа редица процедури кои се неодминлив дел кога пишувате универзитетски учебник. Последните речиси две месеци учебникот се средуваше во печатницата, а тоа е прилично долг период. Но, нејсе, да не се жалам многу, важно е дека се „породи“ бебето. :)

Учебникот е посветен на сите студенти кои чувствуваат глад за науката.

Страниците на овој учебник првенствено се наменети за студентите од Филозофскиот факултет во Скопје и останатите факултети на Универзитетот „Св. Кирил и Методиј“ кои го избрале предметот Академско пишување и објавување и другите сродни предмети во текот на нивните студии. Учебникот може да биде корисен и за многу поширока популација, односно за сите оние кои се заинтересирани да сознаат повеќе за принципите и техниките на академското пишување и објавување. Академското пишување и објавување е начин на комуникација што треба да е усвоен и практикуван од сите членови на академската заедница.

Во овој пост сакам да се заблагодарам на сите кои на некој начин придонесоа да биде испечатен и да изгледа вака како што изгледа.

Голема благодарност до благодарност до Филозофскиот факултет во Скопје, кој и во овие тешки финансиски времиња издвои средства за печатење на учебникот. Многу сме им благодарни на рецензентите проф. д-р Мирко Спироски и проф. д-р Ана Димишковска за навремената и конструктивна рецензија на книгата. Благодарност заслужува секако и научната фондација „Спироски“ за издвоените средства за лектурата на овој универзитетски учебник. Лектурата за три седмици одлично ја заврши лекторката Љубица Севдинска, долгогодишен лектор со која со задоволство соработувам. Корицата маестрално ја подготви психологот Андреа Ивановска, мој одличен соработник во последните четири години.

Учебникот се продава во Студентскиот сервис на Филозофски факултет по цена од 600 денари. За многу кусо време ќе биде достапен во сите Студентски сервиси при факултетите на УКИМ. Можно е да го има и во други книжарници, ако не претераат сопствениците со високите маржи. Заинтересираните индивидуи кои се надвор од Скопје, ќе можат да го нарачаат по пошта, но затоа ќе треба платат дополнително и за брза пошта.

Доколку чувстувате глад за науката или доколку познавате некој што му треба учебникот, подарете им го како исклучителен подарок за Нова година и Божиќ. Во продолжение на постот можете да ја видите предната корица и содржината на учебникот за да знаете дека „не купувате мачка во вреќа“. Ете си направив реклама, другото е на Вас... :)

Раскажувачот

Серија публикации со драги дипломци и постдипломци

Драги колешки и колеги,

Во наредниот период решив да направам серија на постови во кои ќе прикажам мои коавторски трудови со драги дипломци и постдипломци. На овој начин сакам да им направам промоција во стручната и научната јавност во Македонија и пошироко, а во исто време сакам да стимулирам некои други кои досега не биле охрабрени да објават труд или да ги стимулирам идните дипломци и постдипломци. Ќе започнам без некој значаен редослед на важност, туку онака како што ми се распоредени во репозиториумот на УКИМ.

За денес го предвидов трудот објавен заедно со м-р Милена Илиќ Пешиќ под наслов: Квалитет на односот меѓу браќа и сестри кај семејства што имаат дете со аутизам. Овој труд беше објавен во зборникот на трудови од конференцијата по повод 20 години постоење на Институт за дефектологија, конференција која се одржа во Охрид во октомври 2013 година. Инаку, колешката Илиќ Пешиќ е многу вреден дефектолог, вработена во Куманово и моментно е на докторски студии на Институтот за педагогија при ФЗФ. Трудот е произлезен од нејзиниот магистерски труд кој успешно го одбрани на нашиот инситутот под мое менторство.

Коавторот

Мојот прв труд

Драги читатели,

Сакам со вас да го споделам мојот прв објавен труд во стручното и научно списание Македонски медицински преглед. Беше тоа во далечната 1996 година. Средината на 90-тите еден убав и среќен период од мојата кариера. Во џебот имав многу малку пари бидејќи бев волонтер, но живеев многу посреќни побезгрижни денови. Како вчера се присеќавам кога во октомври 1995 година ги запишав моите постдипломски студии на Клиниката за нефрологија и тогаш го направив трансферот од Клиниката за тораковскуларна хирургија на Клиниката за нефрологија при Медицинскиот факултет во Скопје за неверојатни 0 евра. :) Од клиника каде имаше многу рутина и каде асистирав на операции преминав на клиника каде во тоа време се негуваше научната работа. Ни помалку, ни повеќе директно во единицата за интензивна нефролошка нега каде имаше најмногу работа, каде беа најтешките случаи и каде често некои завршуваа со летален исход. Катадневно се правеа записи за прием на болниот, исписи, повремено реанимации, пациенти кои често колабираа заради хемодијализата. Во тоа време раководител на „интензивна" беше проф. д-р Кочо Чакалароски, професор со енциклопедиски знаења во медицината. Тоа подразбираше дека треба да имам уште поголема одговорност кон работата. Покрај секојдневната рутинска работа и честите заглавувања до 17-18 часот, иако работното време беше до 15:00 часот се впуштив во пишување на првиот заеднички труд со него и со група автори кои ќе ги видите во трудот. Подоцна тој ми беше и ментор за мојот магистерски труд кој го одбранив во март 1999 година и од него научив многу работи во медицината и затоа му благодарам во оваа пригода. Трудот носи наслов: Успешно привремено екстерно стимулирање на срцевата акција кај болен со ексцесивна хиперкалемија, во кој презентираме успешно лекуван пациент на кој му претеше лош исход. Оттогаш наваму имам објавено преку 90 стручно научни трудови in extenso во домашната и странската периодика и сето тоа претставува една убава 22 годишна историја на академско публицирање. Доколку сакате да го прочитате или симнете трудот кликнете на погорниот линк. Благодарарение на репозиториумот на УКИМ и овој труд е достапен за поширока публика во отворен пристап.

Раскажувачот

Дигитален репозиториум на УКИМ

Почитувани колешки и колеги, драги пријатели,

Со особено задоволство сакам да ве известам дека почна да функционира дигиталниот репозиториум на Универзитетот „Св. Кирил и Методиј" во Скопје. Имено ова е моја дамнешна идеја. Кога пред отприлика 6 години му споменав на тогашниот декан на ФЗФ и една година подоцна на тогашниот продекан, а сега декан на ФЗФ, дека ФЗФ треба да има дигитален репозиториум по примерот на Медицинскиот и Филозофскиот факултет од Загреб, некако како да се немаше слух, време и веројатно финансии за таа идеја. Некаде кон почетокот на 2017 година УКИМ ја презема таа иницијатива да направи дигитален репозиториум за сите свои членки и го назначи нормално ФИНКИ за реализатор на оваа идеја. Еве речиси по две години го имаме и резултатот. Овде би сакал да се заблагодарам на сите одговорни лица во ректоратот на УКИМ, на проф. д-р Боро Јакимовски координатор од ФИНКИ за целиот проект и проф. д-р Војислав Саракински, координатор од ФЗФ за овозможениот пристап и за досегашната соработка. За 3-4 дена од добивањето на привилегиите да можам да поствувам трудови поставив преку 75 мои авторски и коавторски трудови, брошури, го поставив мојот докторат од декември 2002 година и две магистерски тези во кои сум ментор. Ќе биде ова одлична можност да се видат мои поранешни трудови онлајн. Исто така ќе биде ова одлична можност за промоција на нашите трудови и на трудовите на нашите помлади колеги со што се зголемува видливоста на истите. Зголемената видлиовст ќе води кон зголемена цитираност, а тоа би требало да води до скок на ранг листите на светските универзитети. До репозториумот ќе може да пристапите преку следниот линк. Таму ќе видите линкови до сите факултети, единици на УКИМ, а моите трудови ќе ги барате кај Филозофскиот факултет во разни категории ако што се: научни трудови, трудови од конференции, монографии, тези и слично. Ви посакувам пријатно читање, слободно симнување и задолжително цитирање. Во спротивно ќе бидете плагијатори како една колешка од Штип. :)

Репозитарот

Научник на УКИМ за 2017

Почитувани колешки и колеги, драги пријатели,

Намерно почекав со објавување на овој пост, два дена од добивањето на наградата за најдобар научник во областа на медицинските и здравствените науки за 2017 година на УКИМ за да ми спласне субјективноста :). Имено, на 9 ноември во салата на ректоратот на УКИМ беа промовирани шесте научници од разни области кои покажале врвни резултати во областа на науката за 2017 година. Настанот се случуваше по повод денот на науката за мир и развој кој е на 10 ноември. Во оваа пригода сакам да се заблагодарам на целата комисија за наука при УКИМ кои го препознале мојот труд и решиле да го вреднуваат, а посебно на ректорот проф. Јанкуловски и проректорот за наука проф. Петрушевски кои ја предводеа оваа комисија. Сметам дека овие награди што ги воведе УКИМ од пред неколку години се најдоброто нешто што може да му се случи на еден научник во РМ. Затоа јавно ја поздравувам таа идеја. Сите што добро ме познаваат знаат дека не работам наука за пари, бидејќи ако беше така досега 100 пати ќе се откажев. Мора да се признае и дека вредноста од 60.000 денари ни малку не е симболична и за македонски услови претставува сосема солидна награда. Кога државата одделува само 0.2% од БДП што е мизерно, останува да се радуваме на вакви награди како мали деца што се радуваат на новогодишна играчка Но, повеќе духовниот аспект на наградата е тој кој што обврзува и да во наредниот период се работи уште пожестоко кон остварување и на повисоки цели. Сметам дека оваа награда доаѓа како едно заокружување на речиси еден четврт век работа како доктор по медицина, а 21 година работа на ФЗФ. А, пак уште поголемо е задоволството што доаѓа во предвечерјето кога ќе го прославам својот јубилеен 50-ти роденден.

Што напишаа медиумите за настанот можете да најдете овде.

Слики од настанот во прилог.

Еден од 6-те наградени

Инцијатива против непотизмот на ФЗФ

Предмет: Иницијатива за поведување постапка за донесување интерна одлука против непотизмот на Филозофскиот факултет во Скопје

Почитуван Декане, вонр. проф. д-р Ратко Дуев,

На последната, XIII седница на Наставно-научниот совет на Филозофскиот факултет, одржана на 03.10.2018 година директно ме прозвавте да поведам иницијатива за поведување на постапка за борба против непотизмот, што и го чинам преку оваа мое барање. Сметам дека ваквата практика на ФЗФ треба да прекине и дека вие како деклариран демократ треба да се спротиставите на сите регресивни сили кои го рушат угледот на Филозофскиот факултет во Скопје. Веќе нашироко во градот се зборува дека сме на второ место по непотизам во Македонија, веднаш зад Медицинскиот факултет во Скопје. Знам дека нема да Ви се допадне, но тоа е факт од кој не може да се избега. Имате историска можност овие коруптивни практики да ги прекинете во иднина и еднаш засекогаш да расчистиме со тие непотистички односи на нашиот факултет. Од некаде мора да се започне. Воопшто не е етично да се негуваат непотистички односи во најстарата високо образовна институција во Р. Македонија. 

Предлагам Филозофскиот факултет во Скопје да донесе интерна одлука за неможност на вработување на блиски роднини како по крвно сродство до најмалку трета генерација, така и на некрвно сродни роднини како на пример: сопруг/а, зет, балдеза, баџанак, сват и слично. Ваква практика веќе има востановено на Економскиот факултет во Скопје, а веројатно тоа е случај и на други високо образовни институции во државата. Колку ми е мене познато Вие сте вработен на факултетот без непотистички конекции и токму заради тоа треба да ја поддржите оваа моја иницијатива. Непотизмот е во основа коруптивно однесување, а ние нели не сакаме да бидеме корумпирани? Слабиот рејтинг на УКИМ на светските ранг листи меѓу другото се должи и на високиот процент на непотизам и корупција во високото образование. Сакаме да одиме напред или ќе стоиме во место? Еве да започнам од мене со позитивен пример: изјавувам под полна морална и материјална одговорност дека ниту еден мој близок роднина нема да помисли да се вработи, а не пак да Ви вршам притисок Вам или на било кој друг за негово вработување на факултетот додека сум јас вработен овде. Дали можете и вие да дадете ваква изјава? Дали имате сила и моќ да спроведете ваква одлука? Одлуката би требало да важи како за професорскиот, така и за административниот кадар. Има нешто што се вели академски интегритет, да видиме дали го поседуваат нашите колешки и колеги. 

Во надеж дека оваа моја иницијатива ќе биде разгледана од органите на факултетот и дека мнозинството ќе се изјасни позитивно, колегијално Ве поздравувам. 

Скопје, 05.10.2018                                                                     Проф. д-р Владимир Трајковски