Почитувани читатели,
Сите што подобро ме познавате знаете дека во последните 4 години сум главен и одговорен уредник на списанието Journal for ReAttach Therapy and Developmental Diversities (JRTDD). Кон академското пишување и објавување имам пасија веќе 25 години. Ги поминав сите скалила од технички секретар (1997-2000), заменик уредник (2004-2008) и главен и одговорен уредник (2008-2017) на списанието Дефектолошка теорија и практика, за да во септември 2017 година самоиницијативно се повлечам од принципиелни причини и заради нарушени меѓуколегијални односи. Никогаш минималните финансиски средства што ги дава ФЗФ за оваа намена не ми биле услов за оваа работа. Сите што работеле со мене како заменици уредници, технички секретари веб администратори знаат дека во уредништвото и академското публицирање не сме знаеле што е делник, што е празник. Барем јас така работам, не знам за другите главни уредници на научни списанија. Така и со второво списание, влегов од чисто академски причини да дозавршам некои работи кои ги имав почнато со првото списание и да си докажам себе си дека ме бива за оваа работа. Успеав за 4 години да го индексирам во повеќе од 80 бази на податоци, од кои најзначајни се Scopus, EBSCO, DOAJ, ERIH PLUS, Hinari, Sherpa Romeo, Research Gate, итн. Се` ќе си беше добро да не ја примев оваа е-пошта на 19 април годинава од едикојси кој живее на релација Малезија-Индија.
Respected Editor,
I am Director of Journal acquisition and Management services company, Singapore.
One of our clients is highly interested in fully acquiring your reputed journal and is willing to grow his research career with a journal collaboration. We would like to initiate the negotiation with you from USD 80,000. We make sure the reputation of the journal isn't compromised and we maintain a high confidentiality of the discussion. Request you kindly respond to this email on your feedback/thought for the same. We can have a negotiation if you are interested in taking this conversation further. Also, request you to let us know any factor that I can convince you to proceed further with the acquisition.
I have attached a sample proposal presentation with this email. The attached file will provide details on various factors in the Journal acquisition. Also, if you or your team have any queries, I am available for the discussion anytime and I propose a Zoom meeting at your convenient time and date to discuss the possibilities.
Willing to hear from you at the soonest.
Нормално, веднаш ја информирав колешката од Холандија која е издавач на списанието и со смеење и кажав дека ова е уште една од оние "fishing" пораки кои ги примаме речиси секојдневно. Ни на крај памет не ми беше дека таа ќе „загриза“ и дека ќе преговара за продажба на овој продукт кој го подготвував и се вградив себе си во последните 4 години. Пред извесно време ме информираше дека го продала списанието на господинот и ми ги побара сите пасворди со кои работевме на платформата. Да не ме сфати некој погрешно, во списанието немав никаков сопственички удел и не земав ниту еден долар од горенаведените 80.000 долари, или можеби и повеќе (деловна тајна). Иако јас бев идеологот, реализаторот, уредникот, јас немав никаков сопственички влог, освен интелектуалниот труд. Тоа е тој суров капитализам кој не го интересира наука, туку само „гола паричка“. Не верував дека колешката за која што имав високо мислење, туку така ќе се откаже од идеалите кои ги имавме пред 4 години, но сепак западниот свет го вртат парите, нема тука пријателство, колегијалност и други духовни вредности.
Денес, имавме ЗУМ состанок со новиот издавач, сега кажа дека е во Индија, иако во е-поштата од погоре велеше дека е од Сингапур, па Малезија. Прво не ми се допадна дека доцнеше 10 минути на состанокот, целиот конфузен, брзаше на друг состанок и го водеше разговорот во стилот „сакам кажам, не знам речам“. Тој ќе бил и веб администратор и секретарка и се` што треба. Да не е трагично, ќе беше смешно. Усмено ми понуди да останам како главен уредник, на што јас му одговорив дека чекам сериозна писмена понуда во која ќе бидат наведени сите услови и дека треба да се потпише некаков евентуален договор. Ми рече дека за 2 часа ќе добијам. Поминаа повеќе од 10 часа, се` уште нема ништо добиено.
Да го завршам ова писание, во кое имам измешани чувства: криво ми е што се вложив себе си 100% и што имав сериозни планови за во иднина, односно да го индексирам во Clarivate Analytics и да добиеме фактор на влијание. Мојата соработка со колешката од Холандија ќе ја минимизирам или прекинам, бидејќи не можам повеќе да соработувам со луѓе кои би те продале за 80.000 долари. Од друга страна сум горд што сум постигнал толку висока сума на продукт кој е мое новороденче и доенче, мое чедо. Да не беше оваа купопродажба никогаш немаше да ја знам вредноста на мојот труд и на едно академско списание. Дали ќе прифатам да останам, ќе знаеме во наредните денови, но како што тргнале работиве, не сум голем оптимист. Изгледа ќе треба да почнам од почеток со ново списание, трето по ред, како што се вели во народот „трета среќа“. Ајде да видиме...
Ви благодарам за вниманието што го посветивте читајќи го овој мој пост. Го најавив како „бомба“ на мојот ФБ профил, за некого можеби нема никакво значење, но за македонската научна јавност што се занимава со академско објавување и тоа каква бомба е. Ќе бидам благодарен на оние кои ќе се охрабрат да коментираат на ФБ.
Срдечно,
Главен и одговорен уредник на ЈРТДД (сегашен или минат не е битно)
No comments:
Post a Comment