УПАТСТВО ЗА ПОДГОТОВКА, ИЗРАБОТКА И ПРЕЗЕНТАЦИЈА НА ИНТЕРНЕТ-РЕСУРСИ

Почитувани студенти,

1. Цел на активноста

Во рамките на предметот Физиологија со функционална анатомија, како дополнителна академска активност за стекнување поени, може да ви биде зададена изработка на интернет-ресурси на определена тема од наставната материја. Целта на оваа активност е да ги унапредите вашите способности за самостојно пребарување, критичка процена и селекција на научни и образовни информации, правилно наведување на користените извори и нивно организирање во академски документ.

2. Пребарување и избор на интернет-ресурси

За успешно изработување на задачата потребни ви се интернет-конекција, компјутер и основни познавања од работа со Microsoft Word или соодветен текстуален процесор. За пребарување може да ги користите следниве пребарувачи:

• Google (https://www.google.com)
• Microsoft Bing (https://www.bing.com)
• Yahoo Search (https://search.yahoo.com)

Задача: За доделената тема треба да пронајдете најмалку 5–6 релевантни интернет-извори, по можност на англиски јазик.

При пребарувањето користете стручни и научни клучни зборови на англиски јазик. На пример, за тема поврзана со крвта може да пребарувате: blood physiology, blood cells, erythrocytes, leukocytes, platelets, haemostasis.

Предност треба да им се даде на:

• научни списанија и рецензирани научни публикации;
• универзитетски и медицински образовни ресурси;
• официјални веб-страници на релевантни здравствени и научни институции;
• електронски учебници и стручни прирачници;
• проверени образовни платформи со јасно наведени автори и извори.

Не се препорачува некритичко користење блогови, форуми, комерцијални веб-страници и други извори чија научна веродостојност не може да се потврди.

3. Обработка и систематизирање на пронајдените информации

Откако ќе ги пронајдете соодветните интернет-извори, внимателно прочитајте ја содржината и издвојте ги деловите што се директно поврзани со зададената тема. Информациите треба да бидат организирани логично, тематски и прегледно. Во зависност од темата, може да вклучите дефиниции, анатомски и физиолошки карактеристики, механизми на дејство, функции, класификации, табели, илустрации и клинички примери.

Важно: Целта не е механичко копирање на текстови од различни веб-страници. Потребно е да покажете дека сте ги разбрале пронајдените информации и дека умеете да ги селектирате и систематизирате. Кога користите оригинален текст, тој мора јасно да биде означен како директен цитат и соодветно да биде наведен изворот. При прераскажување со сопствени зборови, исто така мора да го наведете изворот на информацијата. Доколку користите текст на англиски јазик, можете да го задржите во оригинал, во согласност со конкретните инструкции за зададената тема.

4. Техничко уредување на документот

Интернет-ресурсите се подготвуваат во Microsoft Word или во друг компатибилен текстуален процесор и се доставуваат во уреден, читлив и професионален формат. Препорачани технички параметри:

• Формат на хартија: A4.
• Фонт: Times New Roman, 12 pt.
• Проред: Единечен.
• Порамнување: двострано (Justify).
• Маргини: 2,5 cm од сите страни.
• Наслови: јасно означени и доследно форматирани.
• Нумерација на страниците: на сите страници по насловната.
• Табели и слики: со соодветни наслови и наведени извори.

Избегнувајте непотребно шаренило, прекумерно користење различни фонтови, неуредно поставени слики и големи празни површини. Документот треба да биде прегледен, логично структуриран и академски уреден.

5. Структура на интернет-ресурсите

Документот треба да ги содржи следниве делови:

1. Насловна страница

Насловната страница треба да биде изработена според моделот на насловна страница за семинарски труд. Треба да содржи:

• име на универзитетот, факултетот и студиската програма;
• назив на предметот: „Физиологија со функционална анатомија“;
• наслов на темата;
• име и презиме на студентот;
• име и презиме на предметниот наставник;
• место и академска година.

2. Обработена содржина

По насловната страница следуваат најмногу 3–4 страници со избрани и систематизирани информации за зададената тема. Содржината треба да биде тематски организирана, стручна и директно поврзана со предметот.

3. Користени интернет-извори

На крајот од документот задолжително наведете ги сите користени извори, со насловот на страницата или публикацијата, авторот или институцијата кога се достапни, веб-адресата и датумот на пристап.

Пример за наведување интернет-извор:

Author/Institution. (Year). Title of the webpage or resource. URL

Доколку не се наведени автор или година, не измислувајте ги. Наведете ги достапните библиографски податоци и точната веб-адреса. За научни статии, кога се достапни, наведете ги авторите, годината, насловот, списанието, DOI и/или URL.

6. Академски интегритет и правилно користење на изворите

Секој студент е должен да ги почитува принципите на академска чесност. Не е дозволено претставување туѓ текст, идеи, табели или илустрации како сопствена работа. Сите преземени информации мора да имаат соодветно наведување на изворот. Самото наведување на веб-адреса на крајот од документот не е доволно ако не е јасно кои информации во текстот потекнуваат од тој извор. Дозволено е користење дигитални алатки за пребарување, превод и јазично уредување, но студентот е одговорен за точноста на содржината, проверката на изворите и разбирањето на материјалот. Не внесувајте непроверени информации и не наведувајте извори што реално не сте ги консултирале.

7. Презентација и усна одбрана

Изработените интернет-ресурси задолжително се презентираат и усно се бранат во терминот определен за таа цел. За време на одбраната, студентот треба да биде подготвен:

• да ја објасни обработената тема со сопствени зборови;
• да ги истакне најважните научни и стручни информации;
• да образложи зошто ги избрал конкретните интернет-извори;
• да покаже дека ги разбира поимите и физиолошките механизми што ги обработил;
• да одговори на прашања поврзани со темата и со користените извори.

Самото предавање на документот без познавање на неговата содржина не се смета за соодветна академска презентација.

8. Алтернативни можности за изработка на дополнителната задача

Во зависност од дадените инструкции, студентите може да добијат и друга задача поврзана со наставната материја:

А. Пронаоѓање и презентирање образовни програми

Пронајдете соодветни компјутерски програми, интерактивни симулации или виртуелни лаборатории што се применуваат за изучување на физиологијата и функционалната анатомија. Наведете ја нивната намена, главните можности и начинот на кој можат да го олеснат учењето.

Б. Пронаоѓање електронски учебници и стручна литература

Пронајдете релевантни електронски учебници, прирачници и други образовни материјали од областа на физиологијата, анатомијата и сродните биомедицински науки. Користете легално достапни материјали и наведете ги нивните библиографски податоци и линкови.

В. Селекција на едукативни видеоматеријали

Пронајдете и систематизирајте најмалку 60 едукативни видеоклипови поврзани со наставната материја. Видеата треба да бидат тематски организирани, научно релевантни и соодветни за студентско учење.

За секое видео наведете:

• наслов;
• автор, канал или институција;
• директна веб-адреса;
• краток опис на содржината;
• тематска област на која се однесува.

Предност имаат видеа од универзитети, медицински факултети, научни и образовни институции и проверени едукативни канали. Не е потребно незаконско преземање видеа: доволно е да ги организирате и документирате нивните достапни интернет-линкови, освен ако не е зададена поинаква конкретна задача.

9. Завршни напомени

Ве поттикнувам задачата да ја сфатите како можност за стекнување практични академски вештини, а не само како начин за освојување дополнителни поени. Способноста да пронајдете веродостојни научни информации, да ги процените критички и да ги презентирате на јасен и систематизиран начин е важна за вашето понатамошно студирање и професионално усовршување. Ве молам внимателно да ги следите упатствата, да ги почитувате роковите и да подготвите материјали што ќе можете самостојно да ги образложите за време на усната одбрана.

Ви посакувам успешна работа!

Предметен наставник

Најчести забелешки и упатства за добра презентација на семинарските трудови

Почитувани студенти,

Овде би сакал да укажам на најчестите забелешки за вашите презентации на семинарските трудови и воедно да дадам упатства за подобри презентации:

• Честа грешка е дека не ставате нумерација на слајдовите.
• Презентацијата мора да има вовед и заклучок.
• Понекогаш ставате премногу текст на слајдовите.
• Внимавајте да не се ситни буквите, основен фонт најмалку 24pt.
• Текстот и позадината треба да имаат јасен контраст. Без многу бои, ефектни позадини и сл.
• Некои студенти слабо ја имаат научена темата и слабо ја владеат, со тоа и слабо презентираат.
• Потребна е добра интеракција со аудиториумот.
• Некои студенти читаат од слајдовите, тоа не може да се оцени со висок број на поени.
• Немање на илустрации во презентациите. Пожелно е да има слики и табели.
• Секој слајд мора да има заглавје кое го објаснува текстот подолу.
• Нема потреба да држите во рацете листови, концепти, или самата семинарска во печатена верзија. Со тоа прикажувате одредена несигурност.
• Слободно може да се уфрлат анимации, гифови или кратки видеа до 1 минута.
• Некои студенти не го почитуваат времето од 10 минути. Или се прекуси и завршуваат за 5 минути или се предолги повеќе од 10 минути. Сето тоа укажува на недоволна подготвеност.
• За презентација од 10 минути, треба да имате меѓу 10 и 20 слајдови.
• Пожелно е последниот слајд да биде благодарност, контакт информации (е-пошта, социјални медиуми и сл.)
• Пожелно е на првиот и последниот слајд во горните агли да има лого на УКИМ и лого на ФЗФ.

Повеќе информации можете да најдете во најновиот учебник Академско пишување и објавување. Ова е последен пост за денес, по речиси 15 часа работа.

Предметен наставник

Презентација семинарски трудови АСН - 18.05.2022

Почитувани постдипломци,

Вебинарот по предметот АСН ќе се одржи во среда на 18.05.2022 година во 11:00 часот на следниот МТим. Се гледаме онлајн.

Предметен наставник

Учесник на втората Риатач онлине конференција

Почитувани читатели,

Со особено задоволство ве информирам дека во петок на 26 јуни во 16:00 часот на платформата Зум ќе одржам предавање во рамките на втората Риатач онлине конференција. Инаку ова предавање требаше да го одржам на Риатач конференцијата што требапе да се одржи во Скопје на 30 мај, но заради проклетиот Ковид-19 се одложи.

Колегите организатори од Риатач Фондацијата во Холандија решија да се плаќа учеството по цена од 95 евра за сите три денови на конференцијата која ќе трае во периодот од 24 до 26 јуни. Доколку сака некој да се регистрира и да ја види програмата нека кликне на следниов ЛИНК. Конференцијата ќе биде исклучително на англиски јазик.

Во продолжение насловот и терминот за мојата презентација.

16.00 Prof. Dr. Vladimir Trajkovski: Role of the Microbiota-Gut-Brain-Axis in Autism Spectrum Disorder
Professor in ASD, Human Genetics, Physiology, and Functional Anatomy at St. Cyrilus and Methodius University in Skopje. President of the Macedonian Scientific Society for Autism. Editor in Chief of Journal for ReAttach Therapy and Developmental Diversities (JRTDD).

ЈРТДД главен и одговорен уредник

2 години списание ЈРТДД

Почитувани читатели,

Денес, 26 април 2020 година се навршуваат точно две години од како бев назначен за глаевн и одговорен уредник на списанието Journal for ReAttach Therapy and Developmental Diversities. Издавач на списанието е ReAttach Therapy International Foundation од Холандија, а од поново време се вклучи и Македонското начно здружение за аутизам. Морам да признаам дека ова беше одлична валидација на моите претходни 15 годишни напори како главен и одговорен уредник на списанието Дефектолошка теорија и практика во која несебично го вложував својот труд и знаење во неговиот растеж. За овој втор роденден подготвивме интересна Прези презентација за што и благодарам на техничката секретарка Андреа Ивановска за техничката изведба на истата. Благодарност секако заслужува и веб администраторот Ѓорѓи Поп Ѓорѓиев со кого деноноќно работиме на подобрување на функционалноста на веб страницата, ажурирање на нови информации, итн. На крај бескрајна благодарност заслужуваат издвачите Паула и Фредерик Веркамп Бартоломеус кои несебично вложуваат сопствени финансиски средства во развој на ова ново електронско списание. 

Ние продолжуваме натаму со многу жар, љубов и посветеност да го градиме ова интернационално списание. Идејата е да биде што повеќе читано, цитирано и да привлечеме атрактивни автори од целиот свет. Доколку сте заинтересирани да ги видите нашите двогодишни успеси, ве молам кликнете на погорниот линк Прези презентација.

Нека ни е честит вториот роденден!

Главен и одговорен уредник на ЈРТДД

Како да направите добра power point презентација

Драги мои студенти

Во пресрет на семинарите за две седмици сакам да ви дадам некои напатствија како да направите добра  power point  презентација. Искрено се надевам дека нешто од ова ќе го примените во вашите презентации. 

Презентирањето е процес на пренос на информации и притоа треба да внимавате на сите детали и да имате добар контакт со публиката. При презентирањето треба да знаете на која целна публика и се обраќате (во училиште, на клиника, на институт, презентирање на семинарски труд, научен труд, приказ на проект, итн.). Презентацијата е помош за предавачот, а не негова замена. Слајдот треба да ги нагласи битните елементи од предавањето и да укаже на тоа што предавачот го зборува. Слајдот треба да е кус, директен и да вклучува само клучни зборови. За да може вашата презентација да биде прикажана на екран или ѕид, текстовите и сликите треба да бидат во рамка од 95% од слајдот.

Структурата на презентација треба да изгледа вака:

Прв слајд: од кој универзитет, факултет, институт доаѓате, наслов на темата, датум и каков тип на случување е тоа, кој е предавачот.

Втор слајд: основна порака за да привлечете што поголемо внимание.

Трет слајд: преглед на презентацијата (содржина на пример).

Останати слајдови: на врвот наслов на секој слајд и важни елементи кои треба да се потсетник за предавачот. Сите слајдови треба да се нумерирани.

Последен слајд: контакт информации (електронска пошта, веб страница, Фејсбук адреса, блог, Твитер и сл.).

Треба да се придржувате до формата на слајдовите. Наслови, поднаслови и логоа треба да се појавуваат на исто место на сите слајдови. Маргините, фонтовите и боите треба да се во склад со графиконите кои секогаш треба да се наоѓаат на исто место во секој слајд.

Конкретно времетраењето за презентација на семинарските трудови ќе изнесува 10 минути што значи дека треба да имате помеѓу 10 и 15 слајдови.

Не смее да има пренатрпаност на слајдовите со многу текст. Не треба да има вишок на информации. Понекогаш графиконите и сликите можат да се префрлат на други слајдови.

Фонтовите треба да бидат читливи и доволно големи. За основен текст големина најмалку 24, за поднаслови 32, а за наслови 36, 40, или поголеми. Препорачани фонтови се: Times New Roman, Arial, Tahoma, Verdana во МК поддршка за кирилица. Фонтот треба да биде стандардизиран низ целата презентација. Италик не користете бидејќи е тешко за читање. Потцртување се прави само за хиперлинкови. Користете друга боја или болдирање ако сакате нешто да потенцирате. Курзив се користи за цитати, да нагласи одредено мислење или идеи, за наслови на книги, или на списанија. Треба да изберете прикладни, контрастни бои кои треба да се складни со позадината и да не биде прешарено. Користете иста позадина за секој слајд, не експериментирајте премногу. Менувањето на стилот на позадината го одвлекува вниманието. Не користете позадини во кои текстот ќе биде слабо читлив. Секогаш треба да се води сметка за контрастот на боите. При избор на боја водете сметка за просторијата и светлината во неа. Ако просторијата е темна, позадината може да биде темна со светли букви (прим. сино и жолто). Ако просторијата е светла, подобро да се користи светла позадина со темни букви.  За графиконите, сликите и шемите бидете сигурни дека публиката може да ги прочита. Графиконот е визулено поприфатлив начин за претставување на броеви, отколку табела. Илустрациите користете ги кога ќе ви затребаат. Треба да се однесуваат на главната порака, на поентата на предавањето. Едноставните дијаграми се одлични за комуникација со публиката. Графиконите, сликите и анимациите придонесуваат за разбивање на монотонијата во предавањето. При изборот на анимација бидете внимателни да не се одвлече вниманието на слушателите од главната приказна на предавачот. Користете набројување со бројки кога има логични сукцесивни чекори.

Не ги користете медиумите да се сокриете позади компјутерот или проекторот. Медиумите треба да ја подобрат презентацијата, а не да бидат презентација сами по себе. Треба да направите проверка на расположливото време, да се проба предавањето во домашни услови. Предолгите презентации одтануваат недоискажани, а пак прекусите презентации оставаат повеќе време за прашања. Испратете ја презентацијата за проверка дали е се во ред со фонтовите, со кодеците, со други додатоци. Имајте секогаш резервен план, на пример ако користите интернет и тој не функционира. Воопшто не треба да сте нервозни и да имате трема. Понекогаш може да се уфрли досетка, тоа го привлекува вниманието и ја разбива монотонијата, но не смее да се претера. Првиот впечаток е најбитен, не се извинувајте однапред, почекајте да се стиша публиката и почнете со голема сигурност во себе. Изразувајте се разбирливо, бидете доволно гласни, движете се ако можете. Мора да дадете енергичност во предавањето, зашто ако ви е досадно вам, тогаш секако и на публиката ќе и биде досадно. Менувајте го тоналитетот, нагласувајте, а ако треба малку и бидете драматични. Имајте контакт со очи со целата публика, а не гледајте само во една точка. Комуцирајте и со публиката и со комисијата ако се работи за одбрана на дипломски, магистерски или докторски труд.

Во однос на семинарите сакам да укажам на сите пријавени презентери дека вашите презентации претставниците на групите треба да ми ги пратат најдоцна до сабота 05.01.2019 година до 15 часот преку Гугл драјв. Фајлот треба да биде именуван на следниот начин: име и презиме на презентерот-цртичка-наслов на семинарската-цртичка-кус наслов по кој предмет е семинарската работа.

Пример: Благородна Каранфиловска-Генетски дисциплини-ХГФ. Во продолжение уште напомени за добра презентација.

Во надеж дека малку ви помогнав во вашите презентации, срдечно ве поздравувам.

Предметен наставник