Студентски измами

Драги пријателки и пријатели,
Со голема доза на разочараност го пишувам овој пост, бидејќи треба да пишувам за криминогени активности на некои студенти. Некои студенти односот студент:професор го разбираат навистина како вистинска битка, како натпревар во кој професорите треба да бидат изиграни, измамени за да се стигне полесно до целта наречена диплома. Овој пост ви го најавив на ФБ пред една седмица и како и секогаш си останувам на зборот. Имено, за што се работи? Станува збор за случајот Марија Попова, студентка на нашиот институт која сакаше да ја измами комисијата за одбрана на дипломски труд, институтот и факултетот во целост и да пријави дипломски труд без притоа да има положено најмалку 4 испити од курикулумот. Истата таа студентка нема ниту еден положено испит кај мене и кај некои други колеги. Испитите ФФА, ХГ1 и МОИ1 ги положила комисиски, иако за неки од нив воопшто не се појавила на испит кај мене. Ја искористила слабоста на системот, некој ја наговорил дека полесно се проаѓа комисиски и навистина не знам како успеала да помине, кога многу добро ги знам нејзините студентски „квалитети„. Мртва ладна без да има положено ХГ2 и МОИ2 и уште најмалку 2 други испити кај други професори си пријавила дипломски испит, си направила дипломски труд и за големо чудо истиот го одбранила пред трочлена комисија од Институтот. Ќе речете како? Па поднела пријава која не била заверена во „Студентски прашања„, а комисијата едноставно не проверила дали има печат, а тоа се случува затоа што професорите не тргаат од премисата дека можеби некој студент сака да го изигра законот. Кога студенката дошла да си бара диплома, едноставно нема пријави во „Студентски прашања„, нема оцени во индекс, а студентката велела дека наводно го „изгубила„ индексот. Што мислите бре вие драги студенти и студентки дека ние професорите „пиеме нафта„, или сме дојдени од „друга планета„ па не гледаме што се прави и немаме своја компутерска и тефтерска евиденција? Откако комисијата ја открила измамата веднаш реагирала кај Деканот на ФЗФ, кој по одредено време го поништил дипломскиот испит (потег за поздравување). Потоа студентката без „срам ни перде„ се појавила повторно на некои комисиски испити, но процесот е стопиран по итна седница на Институтот на кој едногласно донесовме одлука за дисциплинска мерка испишување од факултет на дотичната студенка. На потег е повторно Деканатот. Во сите цивилизрани земји се знае каква е постапката а тоа би значело исписница од факултет и ставање на црна листа на сите универзитети од дотичната држава. Да не може никаде да дипломира. Искрено се надевам дека Деканатот ќе собере сили, нема да потпадне под разно-разни влијанија и ќе и даде исписница на студентката која не е ни достојна два пати да и го споменам името. Замислите драги мои, таа треба да биде дефектолог, да работи една од најхуманите професии на светот. Како ќе работи со лицата со попреченост ако вака и „сече умот„? Ова мора да пример за другите генерации дека факултетот не е „играчка„ дека студирањето на ФЗФ и УКИМ треба да биде чест и гордост за секој студент, а не место каде што би се измамиле професорите и системот. Вакви кадри ли ќе продуцираме?
Не дека ова е прв случај во нашата понова историја. Имало и порано поситни обиди за измама на пример да се дипломира без еден испит на починат професор во минатото, или да се отиде на комисики испит без 15 ЕКТС поени, но тие случаи биле минорни во однос на овој. Од некаде мора да се почне, за ова едноставно важи слоганот NO PASSARAN.
Професорот